Nuus November 2024

Die FAK-ooreenkoms met Isabel Groesbeek as genealogie konsultant verstryk einde Desember 2024 weens finansiële uitdagings. Die FAK Genealogielessenaar is met Isabel se hulp in Januarie 2020 gevestig en vyf jaar het verloop waartydens navorsing vir vriende en nie-vriende onderneem is, talle konsultasies gevoer is, werkswinkels en beginnerskursusse aangebied is, artikels geskryf is en netwerke met privaatnavorsers, genealogie- en kultuurverenigings en belangstellendes, oa deur twee digitale en drie genealogiefeeste gebou is. Alhoewel Isabel se formele verbintenis met die FAK verstryk, sal DV in die toekoms nog saamgewerk word. Isabel bly as onafhanklike navorser beskikbaar vir navorsingsprojekte, konsultasies, redigering van manuskripte, as gasspreker en aanbieder van beginnerskursus, 'Van waar Gehasi?'

Nuus 2020-
 

Isabel Groesbeek is sedert 2020 deel van die FAK en sedert 2021 van die kultuurtuistefamilie (sluit die FAK (sedert 1929), die Voortrekkermonument en Die Erfenisstigting in).

 

Die Federasie van Afrikaanse Kultuurvereniginge (FAK) het besluit om in 2020 ’n nuwe genealogiese navorsingslessenaar te Pretoria in die eerste plek vir hul lede, maar ook vir die wyer publiek, te vestig.

 

Volgens dr. Danie Langner, uitvoerende hoof van die kultuurtuiste sedert 2021, wat die FAK insluit, sien die FAK genealogie as ’n belangrike sleutel om die historiese geheueverlies onder kinders aan te spreek. Deur genealogie weet elkeen in die gesin waar hy vandaan kom en dit gee baie raakpunte om ook met kinders te gesels oor die konteks waarin hulle ouers of grootouers geleef het.

 

 Die FAK het hande gevat met die bekende genealoog Isabel Groesbeek, wat familielyne sedert 1988 professioneel naspoor, en die FAK vorm 'n vennootskap met Isabel om die FAK FAMILIE- & ERFENISFEES (Genealogie) te organiseer.

Die FAK Genealogielessenaar (www.genealogielessenaar.com) was sedert April 2021 tot helfte Januarie 2022 in die Erfenisstigting Navorsingsbiblioteek op die Voortrekkermonument-terrein gehuisves.
Isabel werk egter vanaf Januarie 2022 vanaf haar tuiskantoor. Sy ontmoet steeds graag FAK-vriende per afspraak by die biblioteek of elders na behoefte (vir bv. groepbesoeke).

Ure per afspraak: Maandae tot Vrydae van 09:00 - 15:00